|
Ծրագրի հակիրճ նկարագրությունը
|
«Լեզվաբանություն» բակալավրիական ծրագիրն ուսանողներին տեսական գիտելիքներ է հաղորդում լեզվաբանության տարբեր գիտակարգերի ոլորտում, ծանոթացնում երկրագիտական և լեզվամշակութաբանական իրողություններին և հնարավորություն տալիս մասնագիտական մակարդակով տիրապետել անգլերենին և ստացած գիտելիքները կիրառել գործնական աշխատանքում: Կրթական ծրագրի նպատակն է պատրաստել լեզվաբանի որակավորմամբ, օտար լեզվի՝ C1 մակարդակի իմացությամբ մասնագետ, որը կցուցաբերի իր մասնագիտության շրջանակում անհրաժեշտ տեսական խոր գիտելիքներ և այդ գիտելիքները գործնականւոմ կիրառելու կարողություններ, ինչպես նաև այնպիսի փոխանցելի հմտություններ, ինչպիսիք են վերլուծական, քննադատական և ստեղծագործական մտածողությունը:
Գործնական օտար լեզվի դասավանդումը զուգորդվում է բազմաթիվ տեսական առարկաներով, միմյանց լրացնող մի շարք մասնագիտական դասընթացներով, որոնք հնարավորություն են տալիս լեզվական միջավայրի բացակայության պայմաններում պատրաստել բարձրակարգ մասնագետներ:
Ծրագրի դասընթացների նկարագրերը հասանելի են այստեղ.
|
|
Ուսումնառության վերջնարդյունքները (գիտելիք, կարողություններ, հմտություններ)
|
·Ցուցաբերել իր մասնագիտության (Լեզվաբանություն) բնագավառում տեսական խորը գիտելիքներ, լեզվի համակարգի և լեզվաբանական հասկացությունների իմացություն, լեզվաբանության միջգիտակարգային հարաբերությունների իմացություն:
·Ճանաչել և տարբերակել ուսումնասիրվող օտար լեզվի բառապաշարային, հնչյունական, քերականական, ոճական և գործաբանական առանձնահատկությունները:
·Ցուցաբերել ուսումնասիրվող լեզվի, աշխարհի լեզվական պատկերի և լեզվի ու մշակույթի փոխհարաբերակցության մասին գիտելիք:
·Գնահատել և համադրել լեզվաբանություն գիտակարգի, ինչպես նաև դրան հարակից գիտակարգերի առկա ուսմունքները և զարգացման միտումները:
·Հավաքել լեզվաբանական խնդիրների շուրջ տեսական և գործնական նյութ` օգտվելով տարբեր աղբյուրներից (համացանցային ռեսուրսներ, էլեկտրոնային գրադարաններ, գիտական գրականություն և այլն):
·Կիրառել լեզվաբանական վերլուծության (համեմատական և զուգադրական վերլուծություն, լեզվաոճական վերլուծություն, բառակազմական վերլուծություն, բաղադրիչային վերլուծություն և այլն ), ինչպես նաև գիտական վերլուծության մի շարք այլ մեթոդներ (վիճակագրական, ինդուկտիվ և դեդուկտիվ վերլուծություն)` հավաքված լեզվական նյութը քննադատորեն վերլուծելու նպատակով:
·Ցուցաբերել օտար լեզվի իմացության (ընթերցանություն, ունկնդրում, բանավոր և գրավոր խոսք) C1 մակարդակ` ըստ Լեզուների իմացության համաեվրոպական համակարգի:
·Ազատ հաղորդակցվել օտար լեզվով, բանավոր և գրավոր, միջմշակութային միջավայրում, առօրյա և պաշտոնական իրադրություններում` արտահայտելով կարծիքը մասնագիտական և ոչ մասնագիտական բանավեճերի և քննարկումների ընթացքում:
·Տիրապետել մի շարք փոխանցելի հմտությունների, ինչպիսիք են քննադատական և ստեղծագործական մտածողությունը, հաղորդակցման (ներառյալ միջմշակութային հաղորդակցման) հմտությունները, թիմային աշխատանքի և կազմակերպչական հմտությունները:
·Տիրապետել ՏՏ հմտությունների, աշխատել հիմնական համակարգչային ծրագրերով MS Office (Access, Excel, Power Point, Word), իրականացնել PPT ներկայացումներ, տիրապետել կորպուսային լեզվաբանության տվյալների հետ աշխատելու, MLA ոճով գիտական հետազոտություններ իրականացնելու հմտություններին և այլն:
·Օգտագործել ձեռք բերված գիտելիքները և հմտությունները հետագա կրթությունը կամ ինքնակրթությունը կազմակերպելու, ինչպես նաև աշխատաշուկայում մրցունակ լինելու համար:
·Ընկալել սեփական մասնագիտական գործունեությունը որպես ընդհանրական մշակութային գործընթացի բաղկացուցիչ, կիրառել մշակույթի մասին ստացած գիտելիքը՝ կոնկրետ մասնագիտական ոլորտում:
·Ցուցաբերել ակադեմիական գրագրության, ակադեմիական ազնվության նորմերի և սկզբունքների իմացություն և կիրառում:
|
