LNSS 2016

ERASMUS+ LNSS գրադարանային ծրագրի մեկնարկային հանդիպում
Մարտ 8-9, 2016 - ԲրաշովՌումինիա

2016թ. մարտի 8-9-ը Ռումինիայի Բրաշով քաղաքում տեղի ունեցավ «Գրադարանային ցանցի աջակցման ծառայություններ. Հայաստանի, Մոլդովայի և Բելառուսի գրադարանների արդիականացում գրադարանի աշխատակազմի մասնագիտական զարգացման և գրադարանների բարեփոխման միջոցով» (LNSS) ԷՐԱԶՄՈՒՍ+ ծրագրի մեկնարկային հանդիպումը: Ծրագրին մասնակցում էին Հայաստանի, Իռլանդիայի, Ռումինիայի, Մոլդովայի, Բելառուսի և այլ երկրների բուհերի ներկայացուցիչներ: Ծրագրի համակարգողն է  Հայաստանի Հանրապետության Պետական կառավարման ակադեմիան: Երևանի Վ. Բրյուսովի անվան պետական լեզվահասարակագիտական համալսարանը (ԵՊԼՀ) ներկայացնում էին ԵՊԼՀ գրադարանի վարիչ Աննա Չուլյանը և Որակի ապահովման կենտրոնի համակարգող Անի Շահինյանը: Ա. Չուլյանը ներկայացրեց ԵՊԼՀ-ի և մասնավորապես գրադարանի գործունեությունը, գրադարանային ռեսուրսներն ու հնարավորությունները, ինչպես նաև ծրագրում ԵՊԼՀ-ի դերակատարությունն ու ծրագրից սպասվող ակնկալիքները: Ծրագրի համակարգող ուսումնական հաստատության՝ Պետական կառավարման ակադեմիայի արտաքին կապերի գծով պրոռեկտոր Թերեզա Խեչոյանը ներկայացրեց ծրագրի նպատակներն ու խնդիրները, աշխատանքային փաթեթները, նախատեսվող աշխատանքներն ու միջոցառումները, ինչպես նաև ծրագրի վերջնարդյունքները: Ծրագրի բոլոր մասնակից բուհերը նույնպես հանդես եկան ներկայացումներով: Հանդիպման ընթացքում քննարկվեցին նաև ֆինանսական խնդիրները և ծրագրի իրականացման արդյունավետության  ապահովման համար անհրաժեշտ այլ նախադրյալները:

LNSS ծրագիրը նպատակաուղղված է բուհերի գրադարանների բարեփոխմանն ու արդիականացմանը, ինչպես նաև գրադարանային ցանցի ապահովմանը: Ակտիվ համագործակցության և փորձի փոխանակման միջոցով ծրագրում ընդգրկված բուհերը հնարավորություն կունենան բարելավելու իրենց գրադարաններն ու մասնակցելու մասնագիտական վերապատրաստումներին, որի արդյունքում կամրապնդվեն գրադարանների միջև համագործակցային կապերը, և գրադարանային բարեփոխումներն ավելի տեսանելի կդառնան:

______________

 

ERASMUSLNSS գրադարանային ծրագրի շրջանակներում 
ESP վերապատրաստման դասընթաց
Հունիս 23-24, 2016 - ԵրևանՀայաստան

 

2016 թ. հունիսի 23-ին և 24-ին Հայաստանի Հանրապետության պետական կառավարման ակադեմիայում անցկացվեցին «Անգլերեն հատուկ նպատակների համար (ESP)» թեմայով վերապատրաստման դասընթացներ «Գրադարանային ցանցի աջակցման ծառայություններ. Հայաստանի, Մոլդովայի և Բելառուսի գրադարանների արդիականացում գրադարանի աշխատակազմի մասնագիտական զարգացման և գրադարանների բարեփոխման միջոցով» (ERASMUS+ LNSS) ծրագրի շրջանակներում: Վերապատրաստումը վարում էին Տրանսիլվանիայի համալսարանի պրոֆեսոր Անջելա Ռեպանովիչին (Բրաշով, Ռումինիա) և Կրետեի համալսարանի գրադարանի վարիչ, դոկտոր Մանոլիս Կուկուրակիսը (Հունաստան):

Վերապատրաստմանը մասնակցեցին նաև Երևանի Վ. Բրյուսովի անվան պետական լեզվահասարակագիտական համալսարանի գրադարանի աշխատակազմի, ինչպես նաև վարչական կազմի ներկայացուցիչները:

Վերապատրաստման դասընթացներին մասնակիցները ծանոթացան տեղեկատվական գրագրության, առցանց գրադարանային ծառայությունների և էլեկտրոնային գրադարանների ոլորտների զարգացման նոր միտումներին ու նորարարություններին: Քննարկվեցին նաև հատուկ կարիք ունեցողներին գրադարանների հասանելիությանն առնչվող մի շարք հիմնախնդիրներ:
Վերապատրաստման ավարտին մասնակիցները կիսվեցին իրենց տպավորություններով և ստացան մասնակցության վկայականներ:

______________

 

ERASMUS+ LNSS գրադարանային ծրագրի շրջանակներում 
ESP վերապատրաստման դասընթաց
Մայիս 19-20, 2016 - Երևան, Հայաստան

 

2016թ. մայիսի 19-20-ը Հայաստանի Հանրապետության պետական կառավարման ակադեմիայում անցկացվեցին «Անգլերեն հատուկ նպատակների համար (ESP)» թեմայով վերապատրաստման դասընթացներ: Միջոցառումը կազմակեպված էր «Գրադարանային ցանցի աջակցման ծառայություններ. Հայաստանի, Մոլդովայի և Բելառուսի գրադարանների արդիականացում գրադարանի աշխատակազմի մասնագիտական զարգացման և գրադարանների բարեփոխման միջոցով» (ERASMUS+ LNSS) ծրագրի շրջանակներում: Դասընթացները վարեցին ծրագրի գործընկեր «The Pyramid Group» (Գերմանիա) կազմակերպության պրոֆեսոր Ջերարդ Քուլենը և դասախոս Սաբրինա Հյութերը: Դասընթացներին մասնակցեցին Երևանի Վ. Բրյուսովի անվան պետական լեզվահասարակագիտական համալսարանի և Հայաստանի Հանրապետության պետական կառավարման ակադեմիայի գրադարանավարները:

Դասընթացները նախատեսված էին անգլերենի տարբեր մակարդակների իմացությամբ մասնակիցների համար: Առաջին խմբում էին սկսնակները, որոնց հետ աշխատեց դասախոս Սաբրինա Հյութերը: Երկու օրվա ընթացքում մասնակիցները կատարում էին տարբեր քերականական վարժություններ, թարգմանություններ, ինչպես նաև անգլերենով հաղորդակցվելու հմտությունները զարգացնող առաջադրանքներ:

Երկրորդ խմբում էին անգլերեն լեզվի մասնագետները և անգլերենին սահուն տիրապետող գրադարանավարները: Պրոֆեսոր Ջերարդ Քուլենը ներկայացրեց եվրոպական չափանիշներին համաձայն ընդունված ինքնակենսագրական (Europass CV) և մոտիվացիոն նամակներ գրելու հմտությունները: Սկզբում մասնակիցները ծանոթացան տեսական նյութին, հաջորդաբար հանդես եկան ներկայացումներով, որոնք արժանացան մասնագետների բարձր գնահատականի:

Դասընթացների ավարտին մասնակիցներին հանձնվեցին համապատասխան հավաստագրերը: