ԵՊԼՀ հավատարմագրում

Հավատարմագրումը ՀՀ ՄՈւՀ-երում (մասնագիտական ուսումնական հաստատություն)  կրթության որակի ապահովման և շարունակական բարելավման կարևորագույն գործընթացներից է, որը թույլ է տալիս պարբերաբար գնահատել ՄՈՒՀ-ի գործունեության արդյունավետությունը, ինչպես նաև գնահատել` արդյոք ՄՈւՀ-ն իրականացնո՞ ւմ է իր առաքելությունը և արձագանքո՞ ւմ է պետության և հանրության կողմից ներկայացվող պահանջներին: Բացի այդ, հավատարմագրումը թույլ է տալիս վերհանել ՄՈւՀ-ի գործունեության ուժեղ և թույլ կողմերը, թիրախավորել կուտակված փորձառությունն ու կատարելագործել որակի ներքին ապահովման մեխանիզմները:

ԵՊԼՀ-ն անցել է հավատարմագրում և Հայաստանի Հանրապետության կառավարության 2011 հունիսի 30-ի N 978 որոշման 11-րդ կետի և Մասնագիտական կրթության որակի ապահովման ազգային կենտրոն հիմնադրամի հավատարմագրման հանձնաժողովի 2015 թ. ապրիլի 11-ի N 9 որոշմամբ ԵՊԼՀ-ին շնորհվել է ինստիտուցիոնալ հավատարմագրում:

ԵՊԼՀ որակի ներքին ապահովման համակարգը հաշվետու ժամանակահատվածում անցել է նաև արտաքին գնահատում միջազգային փորձագետների կողմից:  2016թ. հոկտեմբերին ԵՊԼՀ ՈԱԲ կենտրոնը, համակարգելով Տեմպուս GOVERN ԵՊԼՀ աշխատանքային խմբի աշխատանքները, Գերմանիայում միջազգային հավատարմագրման կազմակերպության (ASIIN) ձևաչափի հիման վրա իրականացրել և Տեմպուս GOVERN ծրագրի ղեկավար թիմին է ներկայացրել ԵՊԼՀ գործունեության ինքնավերլուծություն հետևյալ երեք չափանիշների ուղղությամբ՝ (1) ռազմավարական պլանավորում, (2) մարդկային ռեսուրսների կառավարում, (3) որակի կառավարում:  Փորձագետները հանդիպում-քննարկումներ են ունեցել բուհի ղեկավարության, ՈԱԲ կենտրոնի անձնակազմի, ՊԴ կազմի և ուսանողների հետ: Այցից հետո փորձագետները ներկայացրել են գնահատման արդյունքները:

Ներկայումս ԵՊԼՀ-ն գտնվում է 2-րդ ինստիտուցիոնալ հավատարմագրման գործընթացում: 

Ի՞նչ է ինստիտուցիոնալ հավատարմագրումը 

 Ինստիտուցիոնալ (ենթակառուցվածքային) հավատարմագրումը պետության կողմից ուսումնական հաստատության կրթական և  որակի ապահովման գործընթացների, մասնագիտությունների կրթական ծրագրերի պետական կրթական չափորոշիչներին, ՀՀ ՈԱՇ-ի նկարագրիչներին և ենթակառուցվածքային հավատարմագրման չափանիշներին համապատասխանության ճանաչումն է, որը շնորհվում է որոշակի ժամկետով՝ հավաստելով, որ ուսումնական հաստատությունները կամ կրթական ծրագրերն ունեն անհրաժեշտ կարողություն՝ տվյալ ժամանակահատվածում երաշխավորված որակով կրթական գործունեություն իրականացնելու համար: Այն  պարբերաբար իրականացվող պարտադիր գործընթաց է մասնագիտական ուսումնական բոլոր հաստատությունների համար: Այս գործընթացը թույլ է տալիս պարբերաբար գնահատել ՄՈՒՀ-ի  գործունեության արդյունավետությունը, ինչպես նաև վերահսկել` արդյոք այն իրականացնո՞ ւմ է իր առաքելությունը:  

Հավատարմագրման ընթացակարգ

Ինստիտուցիոնալ և ծրագրային  հավատարմագրման գործընթացները, ըստ Հայաստանի Հանրապետության կառավարության 2011 հունիսի 30-ի N 978 որոշման 8-րդ կետի առաջին ենթակետի,  իրականացվում են երեք հաջորդական փուլով`

Առաջին փուլ. ուսումնական հաստատության ինքնավերլուծություն: Այս փուլում հավատարմագրման գործընթացում գտնվող հաստատություններն ուսումնասիրում են իրենց առաքելությունը, նպատակները, գործընթացները և ձեռքբերումները մանրամասն ինքնավերլուծության գործընթացի միջոցով:

Երկրորդ փուլ. արտաքին գնահատում  անկախ փորձագետների խմբի կողմից: Փորձագիտական այցի հիմնական նպատակն է պարզել ինքնավերլուծության մեջ նշված փաստերի և տեղեկատվության հավաստիությունը, ձեռք բերել լրացուցիչ տեղեկատվություն հանդիպումների և հարցումների միջոցով, ուսումնասիրել կրթական գործընթացները և լրացուցիչ փաստաթղթերը` ավելի լավ պատկերացնելու փորձաքննության ենթակա ուսումնական հաստատության գործունեությունը: Այսինքն`փորձագետներն իրականացնում են փորձագիտական վերլուծություն, որից հետո տրամադրվում են ձեռքբերումների մասին վկայություններ և խորհրդատվություն`աշխատանքների հետագա բարելավման նպատակով:

Երրորդ փուլ. Որակի ապահովման ազգային կենտրոնի (ՈԱԱԿ) hավատարմագրման խորհրդի կողմից վերջնական փորձագիտական զեկույցի պատրաստում և որոշման կայացում/www.anqa.am/: