Հունիսի 7-ին՝ ժամը 15:00-ին, Ավստրիական գրադարանը կազմակերպում է գրական հանդիպում գրականագետ, թարգմանիչ և դիվանագետ Աշոտ Ալեքսանյանի հետ, ով բազմաթիվ գրական ստեղծագործությունների, գրականագիտական հրապարակումների և գերմանալեզու գրականության հայերեն թարգմանությունների հեղինակ է: Նա թարգմանել է Ռոբերտ Մուզիլի, Շտեֆան Գեորգեի, Հերման Հեսսեի, Ռայներ Մարիա Ռիլկեի, Ռոբերտ Վալզերի, Հերման Բրոխի, Գոթֆրիդ Բենի, Թոմաս Բեռնհարդի, Քրիստոֆ Ռանսմայերի ստեղծագործությունները:
Միջոցառման քննարկման առարկան ավստրիացի մեծանուն գրող Ռոբերտ Մուզիլի «Մարդն առանց հատկությունների» վեպն է, որը բացառիկ տեղ է գրավում 20-րդ դարի գեղարվեստական գրականության պատմության մեջ: Միջոցառման ընթացքում բանախոսը կներկայացնի նաև վեպի թարգմանության դժվարությունները, ինչպես նաև թարգմանական առանձնահատկությունները և հնարները:
