Վ. Բրյուսովի անվան պետական համալսարանը և Հայաստանի ազգային կինոկենտրոնը, կնքված երկկողմ պայմանագրի համաձայն, սույն թվականի ապրիլի 30-ին կազմակերպել էին ռեժիսոր Հենրիկ Մալյանի «Մենք ենք, մեր սարերը» ֆիլմի ցուցադրությունը՝ ֆրանսերեն ենթագրերով: Թարգմանությունը կատարել էին ԲՊՀ մի խումբ ուսանողներ:
Ֆիլմի ցուցադրությանը ներկա էին Հայաստանում Ֆրանսիայի դեսպանատան մշակույթի և համագործակցության հարցերով խորհրդական Գիյոմ Նարժոլեն, Հայաստանում Ռումինիայի արտակարգ և լիազոր դեսպան Կորնել Իոնեսկուն, Երևանի Կինոյի և Թատրոնի պետական ինստիտուտի ռեկտոր Սառա Նալբանդյանը, Հայաստանի ազգային կինոկենտրոնի տնօրեն Շուշանիկ Միրզախանյանը, Կինոկենտրոնի աշխատակիցները, Նարինե Մալյանը և Դավիթ Մաթևոսյանը, Ֆրանսիայից ժամանած հյուրեր, դասախոսներ և ուսանողներ:
Ողջույնի խոսքում ԲՊՀ ռեկտոր Դավիթ Գյուրջինյանը շեշտեց միջոցառման կարևորությունը՝ ընդգծելով, որ այս կարևորագույն նախագիծը պետք է շարունակական բնույթ կրի և ընդլայնի շրջանակը՝ ներգրավելով նաև այլ լեզուների ամբիոններ: Ռեկտորը շնորհավորեց ուսանողներին՝ նշելով, որ մշակութային երկխոսությունն ապահովող այս նախագծում կարևոր է թե՛ ուսանողների ներգրավվածությունը, թե՛ ֆրանսերեն դասավանդողների ավանդը:
Հայաստանի ազգային կինոկենտրոնի տնօրեն Շուշանիկ Միրզախանյանն իր ելույթը սկսեց շնորհակալություն հայտնելով այս նախաձեռնության համար և շեշտեց, թե որքան կարևոր են այսօր նման թարգմանությունները՝ ինչպես ֆրանսերեն, այնպես էլ այլ լեզուներով՝ աշխարհին մեր մշակութային արժեքները ներկայացնելու համար: