Ռումինիայի արքայազնը հանդիպել է Վ. Բրյուսովի անվան պետական համալսարանի ուսանողների հետ
ԵՐԵՎԱՆ, 29 ՀՈԿՏԵՄԲԵՐԻ, ԱՐՄԵՆՊՐԵՍ: Ռումինիայի արքայազն Ռադուն հանդիպել է Երևանի Վ. Բրյուսովի անվան պետական լեզվահասարակագիտական համալսարանի ուսանողների և դասախոսական կազմի հետ:
«Արմենպրես»-ի փոխանցմամբ՝ համալսարանի ռեկտոր Կարինե Հարությունյանն իր ողջույնի խոսքում համառոտ ներկայացրեց համալսարանի բազմալեզու և բազմամշակույթ ակադեմիական միջավայրը և կարևորեց մեր երկու երկրների միջև արդեն տասնամյակներ ձգվող բարեկամական կապը: Նա նշեց, որ Բրյուսովի համալսարանում դասավանդում են 20-ից ավելի լեզուներ, այդ թվում̀ ռումիներեն: Ռեկտորի խոսքին հաջորդեցին ուսանողների̀ ռումիներենով հնչեցրած խոսքերը̀ ուղղված արքայազն Ռադուին և պատվիրակության անդամներին:
Արքայազն Ռադուն իր խոսքում հիշեցրեց, որ իրենց ինքնությունը պահպանելու ճանապարհին Հայաստանն ու Ռումինիան անցել են նմանօրինակ պատմական դժվարություններով և իրենց պատմական անցյալով վաստակել են միջազգային հանրության կողմից հարգված և գնահատված լինելու իրավունքը: «Լեզուների իմացությունն ունի ռազմավարական նշանակություն», ասաց արքայազն Ռադուն իր ոգեշնչող խոսքում:
«Մենք պետք է առանձնակի կարևորություն տանք կրթությանը և բաց լինենք նոր գաղափարների հանդեպ: Միացնելով մեր ջանքերը կրթության, զբոսաշրջության և այլ ոլորտներում, մենք կկարողանանք մեր երկրների միջև հաստատված համագործակցային հարաբերությունները բերել մի նոր մակարդակի: «Քաղաքականությունն այն ուժն է, որ օգնում է մեզ դիմակայել դժվարություններին, սակայն կայուն պետություն և ժողովրդավարական երկիր կառուցելու լավագույն երաշխիքը հավասարակշռության ապահովումն է քաղաքականության և հանրության միջև», հավելեց հարգարժան հյուրն իր խոսքի վերջում:
Հիշեցնենք, որ Ռումինիայի արքայազն Ռադուն Հայաստանում է գտնվում Հանրապետության նախագահ Արմեն Սարգսյանի հրավերով: Որպես արքայադուստր Մարգարիտայի ամուսին՝ արքայազն Ռադուն հաճախ ուղեկցում է իր կնոջը, աջակցում երկրի սոցիալական և տնտեսական ծրագրերին: Արքայազնը մի շարք ռումինական բարեգործական կազմակերպությունների անդամ է:
