Հանդիպման ընթացքում ներկայացվեցին մի շարք միջազգային ծրագրեր՝ կամավորական և պրակտիկայի հնարավորություններ տարբեր երկրներում, ինչպես նաև առաջնորդության և թիմային աշխատանքի զարգացման դասընթացներ։ Կազմակերպության ներկայացուցիչները նշեցին, որ այս ծրագրերին մասնակցելով Բրյուսովի համալսարանի ուսանողները ձեռք կբերեն ոչ միայն մասնագիտական փորձ, այլև մշակութային փոխանակման հարուստ փորձառություն։

ՍՄԱՐԹ կենտրոնում տիրում էր ակտիվ և ջերմ մթնոլորտ․ ուսանողները մեծ հետաքրքրությամբ լսում էին հյուրերին, տալիս հարցեր և կիսվում սեփական փորձով։ Շատերն ընդգծեցին, որ նման հանդիպումները օգնում են հասկանալ՝ ինչպես կարելի է համատեղել ուսումը, անձնական զարգացումը և միջազգային փորձը։

AIESEC-ի ներկայացուցիչները նաև պատմեցին, թե ինչպես են կազմակերպության անդամները Հայաստանում իրականացնում տարբեր սոցիալական և կրթական նախաձեռնություններ՝ երիտասարդների ներգրավմամբ։ Նրանք կարևորեցին, որ յուրաքանչյուր ուսանող կարող է դառնալ փոփոխությունների մասնակից, եթե պատրաստ է ստանձնել նախաձեռնություն և զարգանալ բաց մտածողությամբ միջավայրում։

Այս հանդիպումը ևս մեկ անգամ ապացուցեց, որ Վ. Բրյուսովի անվան պետական համալսարանը շարունակում է լինել այն վայրերից մեկը, որտեղ ուսանողները ոչ միայն կրթություն են ստանում, այլև բացահայտում են իրենց անձնական և մասնագիտական աճի նոր ուղիները։

ԲՊՀ Լրագրության 4-րդ կուրսի ուսանող Ստելա Ասրյան
ԲՊՀ Սերվիսի 3-րդ կուրսի ուսանող Նանա Խաչատրյան