2002թ․ մարտի 27-ին առաջին անգամ Հայաստանում հիմնադրվեց «Դանթե Ալիգիերի» ասոցիացիայի երևանյան կոմիտեն, որը իտալերենի դասախոս Վիկտորյա Մանգասարյանի նախագահությամբ գործեց ութ տարի Բրյուսովի անվան պետական համալսարանում (իտալերենի 1409 լսարան): Այն 1889 թ. Հռոմում հիմնադրված «Դանթե Ալիգիերի» ասոցիացիայի` աշխարհում գործող ավելի քան 400 մասնաճյուղերից մեկն է, որը կոչված է տարածելու և խթանելու իտալերենը և իտալական մշակույթը Հայաստանում։ Հիմնադրման օրից մինչ օրս Կոմիտեն սերտորեն համագործակցել և համագործակցում է «Դանթե Ալիգիերի» ասոցիացիայի (նստավայրը՝ Հռոմ) և Հայաստանում Իտալիայի դեսպանության հետ։

2018թ․ դեկտեմբերի 20-ին Երևանի The Loft կենտրոնում տեղի ունեցավ «Դանթե Ալիգիերի» ասոցիացիայի երևանյան Կոմիտեի վերաբացման շնորհանդեսը, որի ընթացքում նորընտիր նախագահ Հասմիկ Պողոսյանը (2006-2016թ․թ․ ՀՀ Մշակույթի նախարար) ներկայացրեց կազմակերպության առաքելությունն ու ծրագրերը: Կոմիտեի իրավաբանական հասցեն էր՝ Աբովյան 3։