ԲՊՀ ռեկտոր Դավիթ Գյուրջինյանը ողջունեց դեսպանի այցը՝ նշելով համալսարանի պատրաստակամությունը՝ շարունակելու և խորացնելու համագործակցությունը իտալական բուհերի, դեսպանության և մշակութային կառույցների հետ․
«Վ. Բրյուսովի անվան պետական համալսարանում դասավանդվում են ավելի քան երկու տասնյակ լեզուներ, և իտալերենը դրանց մեջ զբաղեցնում է իր առանձնահատուկ տեղը։ Մենք վերականգնել ենք համագործակցությունը Պերուջայի օտարերկրացիների համալսարանի հետ, շարունակում ենք ակտիվ աշխատել Վերոնայի համալսարանի հետ, որտեղ ներկայումս ուսանում են մեր չորս ուսանողները։ Համալսարանում անցկացվում է CELI (Իտալերենի հավաստագրման երևանյան կենտրոն) քննությունը։ Մենք բարձր ենք գնահատում դեսպանատան աջակցությունը և բաց ենք համագործակցության նոր ձևաչափերի համար»։
Հանդիպման ընթացքում քննարկվեցին նաև «Դանթե Ալիգիերի» հայաստանյան կոմիտեի գործունեությանը և հետագա համատեղ ծրագրերին առնչվող հարցեր։
Պաշտոնական այցի շրջանակում հյուրերը մասնակցեցին «Դանթեական օր» խորագրով միջոցառմանը, որտեղ ներկայացվեցին Դանթե Ալիգիերիի ստեղծագործություններին նվիրված գրական, երաժշտական և գեղարվեստական կատարումներ։ Վազգեն Սարգսյանի անվան ռազմական ակադեմիայի կուրսանտներն ընթերցեցին հատված «Աստվածային կատակերգությունից», իսկ ԲՊՀ ուսանողները հանդես եկան արտասանությամբ, երաժշտական կատարումով և գեղարվեստական ցուցադրությամբ։ Միջոցառումն ավարտվեց բանախոս Կարլո Անեդայի զեկուցմամբ՝ նվիրված կոմս Ուգոլինոյի կերպարին։
Այս հանդիպումը վկայում է Վ. Բրյուսովի անվան պետական համալսարանի և Իտալիայի Հանրապետության միջև հաստատված ջերմ ու արդյունավետ համագործակցության մասին։ Այն բացում է նոր հեռանկարներ կրթական, մշակութային և գիտական փոխանակումների համար՝ ի նպաստ հայ-իտալական բարեկամական կապերի հետագա ամրապնդման։