Հանդիպում Ավ. Իսահակյանի անվան թիվ 16 ավագ դպրոցի աշակերտների հետ

Ս.թ. մարտի 21-ին՝ ժամը 11:00, ԵՊԼՀ-ի գրադարանի մասնաշենքի նիստերի դահլիճում տեղի ունեցավ հանդիպում Ավ. Իսահակյանի անվան թիվ 16 ավագ դպրոցի աշակերտների հետ: Ներկայացվեցին ԲՈՒՀ-ի կրթական ծրագրերը, համալսարանում դասավանդվող լեզուները, ուսանողական կյանքը: Հանդիպումը տեղի ունեցավ ԵՊԼՀ-ի և 22 ավագ դպրոցների միջև արդեն իսկ կնքված համագործակցության շրջանակներում: 

Հնդիպմանը ներկա էին ԿՄՄ և ԹՄՀ ֆակուլտետների դեկաններ Դ.Ղազարյանն ու Հ. Ճանճապանյանը, ինչպես նաև ՌՕԼ ֆակուլտետի փոխդեկան Գ. Փիլավջյանը: Վերջիններս իրենց ողջույնի խոսքում աշակերտների համար ներկայացրին ԵՊԼՀ ուսանող դառնալու մի շարք առանձնահատկություններ, հայտնեցին որոշակի մանրամասներ համապատասխան ֆակուլտետներում մասնագիտանալու հետ կապված, ինչպես նաև տեղեկացրին այն բոլոր հնարավորությունների մասին, որոնցից կարող է օգտվել ԵՊԼՀ ուսանողն իր ուսումնառության ընթացքում:

Հանդիպման հաջորդ փուլը վարեցին ԵՊԼՀ Կոնֆուցիոսի ինստիտուտի չինացի մասնագետները, ովքեր հատուկ չինական թեյախմություն կազմակերպեցին աշակերտների համար, ապա նաև կորեերենի ամբիոնի ուսանողները կիսվեցին իրենց ուսումնառության առանձնահատկությունների մասին: Հաջորդիվ աշակերտները ներկա գտնվեցին անգլերենի ամբիոնի որոշ դասախոսների դասերին:

Աշակերտներն ու նրանց ուղեկցող ուսուցիչները բավական տպավորված էին, ինչի կապակցությամբ իրենց գոհունակությունն արտահայտեցին հանդիպման ավարտին: 

«Շատ մեծ տպավորություններ ստացանք այսօրվա միջոցառումից, շատ ոգեշնչվեցինք, որ ՀՀ-ում կան այսպիսի բուհեր, որոնք պատրաստ են այսքան լայն հնարավորություններ ստեղծել մեզ համար, ինչպես նաև մտածելու մեծ տեղիք տվեց ինձ՝ լեզուների ուղղությամբ մասնագիտանալու առումով, թեկուզ որպես երկրորդ մասնագիտություն»,- մեզ այսպես կիսվեց իր տպավորություններով թիվ 16 ավագ դպրոցի 11-րդ դդասարանի աշակերտուհի Տաթև Տոնոյանը:

Աշակերտները նաև այցելեցին ԵՊԼՀ թանգարան, ԵՊԼՀ պատմության թանգարան:

ԵՊԼՀ կարիերայի կենտրոնի ղեկավար Լևոն Բաբամյանի խոսքով՝ այս համագործակցությունը շարունակական է լինելու:

Հանդիպում Ավ. Իսահակյանի անվան թիվ 16 ավագ դպրոցի աշակերտների հետ