Գերմանական «Արվատո» կազմակերպության ներկայացուցիչները ԵՊԼՀ-ում

Հունվարի 16-ին Երևանի Վ. Բրյուսովի անվան պետական լեզվահասարակագիտական համալսարանում տեղի ունեցավ հանդիպում գերմանական «Արվատո» կազմակերպության ներկայացուցիչների հետ, որոնք գերմաներեն սովորող ուսանողներին ներկայացրին ընկերությունը` շեշտադրելով այն առավելությունները, որոնք առաջարկվում են աշխատակիցներին: Հանդիպմանը ներկա էր ԵՊԼՀ գերմաներենի ամբիոնի վարիչ Էլիզա Ղազարյանը:

«Արվատո» ընկերությունների խումբն իր ներկայացուցչությունն ունի աշխարհի ավելի քան 35 երկրում, իսկ Հայաստանը կարող մեծ հնարավորություն ունի ապագայում համալրել այդ շարքերը։ Ընկերության միջնորդ կազմակերպությունը Հայաստանում Գերմանական տնտեսական միությունն է:

«Շատ ուրախ ենք մեր գործընկերների հետ լինել Հայաստանում և ներկայացնել մեր ընկերությունը: Աութսորսինգի ծառայությունների լայն շրջանակի միջազգային մատակարար համարվող մեր ընկերության նպատակներից է ընկերության շարքերը գերմանացիներից բացի նաև այլ ազգերի գերմաներեն տիրապետող ներկայացուցիչներով համալրելը: Սա շատ կարևոր սկզբունք է մեզ համար»,-նշեցին ընկերության ներկայացուցիչները:

Հանդիպման ընթացքում ուսանողներն ուղղեցին իրենց հուզող հարցերը, պատմեցին իրենց երազանքի աշխատանքի մասին։ Գերմանացի հյուրերը հետաքրքրվեցին նաև ուսանողների գերմաներեն ուսումնասիրելու պատճառների և նպատակների մասին: Գերմանիայում եղած ուսանողները պատմեցին նաաև Գերմանիայում սովորելու և ապրելու սեփական փորձառությունը։

Հավելենք, որ ընկերությունների «Արպատո» խմբին են պատկանում շուրջ 270 ձեռնարկություններ, որոնցում աշխատում են ավելի քան 65 հազար աշխատակիցներ։