Ս.թ. նոյեմբերի 21-ին ԲՊՀ-ում հյուրընկալվեց ESFAM-ի (Վարչարարության և մենեջմենթի ֆրակոֆոնիայի մասնագիտացված հաստատություն) տնօրեն Նիկոլա Մայնետին:
Ընդգծենք, որ Վարչարարության և մենեջմենթի ֆրակոֆոնիայի մասնագիտացված հաստատությունը, որը նախկինում հայտնի էր որպես Վարչարարության և կառավարման ֆրանկոֆոնիայի ինստիտուտ (IFAG), Ֆրակոֆոնիայի համալսարանական գործակալության (AUF) երեք հաստատություններից մեկն է: Այն տեղակայված է Բուլղարիայի մայրաքաղաք Սոֆիայում և բաց է Կենտրոնական և Արևելյան Եվրոպայի, ինչպես նաև ֆրանկոֆոն աշխարհի այլ տարածաշրջանների բոլոր ֆրանսախոս երիտասարդների համար:
ESFAM-ն առաջարկում է մագիստրոսական կրթական ծրագրեր կառավարման ոլորտում: ESFAM-ի առաքելությունն է պատրաստել մասնավոր և հասարակական կազմակերությունների ապագա ձեռնարկատերեր, մենեջերներ և ղեկավարներ՝ առաջին հերթին նպաստելու տարածաշրջանի երկրների զարգացմանը (Ալբանիա, Հայասատան, Ադրբեջան, Բելառուս, Բոսնիա և Հերցեգովինա, Բուլղարիա, Խորվաթիա, Էստոնիա, Վրաստան, Հունաստան, Հունգարիա, Լիտվա, Լատվիա, Ղազախստան, Ղրղզստան, Կոսովո, Հյուսիսային Մակեդոնիա, Մոնտենեգրո, Մոլդովա, Ուզբեկստան, Լեհաստան, Չեխիա, Ռումինիա, Ռուսաստան, Սերբիա, Սլովակիա, Սլովենիա, Տաջիկստան, Թուրքմենստան, Թուրքիա, Ուկրաինա):
Ն. Մայնետիի հետ հանդիպմանը Ուսումնագիտական աշխատանքների հարցերով պրոռեկտոր Բ. Մարգարյանը բարձր գնահատեց ESFAM-ի և ԲՊՀ-ի միջև առկա համագործակցությունը. «Մենք կարևորում ենք, որ առկա համագործակցությունը ոչ միայն «թղթի վրա» է, այլ բավական իրական ու գործնական է»: Ընդգծենք, որ նախորդ տարվանից ԲՊՀ-ի 2 շրջանավարտ՝ Միլենա Սայանը և Գագիկ Կարապետյանը, իրենց ուսումը շարունակում են ESFAM-ում:
