Ս.թ. ապրիլի 22-ին Վ. Բրյուսովի անվան պետական համալսարանում տեղի ունեցավ միջազգային համագործակցությանն ու փորձի փոխանակմանը նվիրված կարևոր հանդիպում։ Էրազմուս+ կրեդիտային շարժունության ծրագրի շրջանակում վերապատրաստում անցած ԲՊՀ աշխատակիցները ներկայացրին իրենց մասնագիտական ձեռքբերումները:
Հանդիպման նպատակն էր տարածել եվրոպական առաջատար համալսարաններում ձեռք բերված փորձառությունը, ոգեշնչել համալսարանի գիտակրթական հանրությանը և ընդգծել միջազգային ծրագրերի դերը համալսարանական զարգացման ուղու վրա։
Միջոցառումը կայացավ ԲՊՀ նիստերի փոքր դահլիճում՝ երկու փուլով։ Ներկաները նախ հնարավորություն ունեցան ծանոթանալու Մադրիդի Կոմպլուտենս համալսարան այցելած ԲՊՀ երեք աշխատակիցների հաշվետվություններին։ Նրանք ներկայացրին իրենց մասնագիտական ուղին Իսպանիայի ամենահեղինակավոր բուհերից մեկում՝ անդրադառնալով ուսումնական միջավայրին, համագործակցության ձևաչափերին և այն նորարարական մոտեցումներին, որոնք կարող են կիրառվել նաև ԲՊՀ-ում։
Երկրորդ հատվածում ելույթ ունեցան Վալյադոլիդի և Ալմերիայի համալսարաններում վերապատրաստված մասնակիցները։ Նրանց խոսքը հագեցած էր կոնկրետ օրինակներով, նախաձեռնություններով և հստակ պատկերացումներով։
