Անցնելով բազում դժվարությունների, անհանգստությունների միջով՝ այժմ գրում եմ այս տեքստը Բարսելոնայից։ Իմ էրազմուս + փորձը ամենաանսպասելի ու հիասքանչ իրադարձությունն էր իմ կյանքում և միայն սկիզբը բոլոր իմ պլանների և նպատակների։ Մեկ կիսամյակ սովորել եմ Իսպանիայի Վայադոլիդի համալսարանում՝ Իրավագիտության ֆակուլտետում։ Վայադոլիդի համալսարանը համարվում է Եվրոպայի ամենահին համալսարաններից մեկը։ Այն, ինչ տվեցին ինձ այս ամիսները, չեմ փոխի կյանքում ոչնչի հետ։ Ծրագրի շնորհիվ դարձա ավելի անկախ ու ինքնավստահ։ Ձեռք բերեցի հիանալի ընկերներ աշխարհի տարբեր ծայրերից՝ Աֆրիկայից մինչև Կենտրոնական Եվրոպա և Ասիա։ Սովորելով միջազգային համալսարանում` ծանոթացա միանգամայն այլ կրթական համակարգի և կրթական որակի հետ։ Պրոֆեսորադասախոսական անձնակազմը անում էր ամեն ինչ՝ ուսանողներին տալու ակադեմիական գիտելիքներ, որոնք կիրառելի կլինեն հետագա կարիերայում։
Այն շենքը, որտեղ սովորել եմ, համարվում է Վայադոլիդի ամենահին կառույցներից մեկը և կառուցված է միջնադարյան գոթական ոճով։ Վստահաբար կարող եմ ասել, որ առաջին անգամ այնտեղ եկողը կարող է շփոթել թագավորական պալատի հետ։ Էրազմուսի շնորհիվ բացահայտեցի ինձ համար ամբողջությամբ նոր մշակույթ և ձեռք բերեցի ինձ և իմ երկրի համար օգտակար գիտելիքներ։ Ճամփորդել եմ Իսպանիայի ավելի քան 10 քաղաքներում, եղել եմ Եվրոպայում մեծ ճանաչում ունեցող թանգարաններում, տեսել եմ միջնադարյան թագավորական պալատներ և ամրոցներ։ Ես Դիանան եմ, այն նույն սյունեցի աղջիկը, ով Կապանից եկավ Երևան իրականացնելու համար իր երազանքներն ու նպատակները, բայց այժմ ես առավել ուժեղ եմ, ուժեղ եմ գիտելիքներով և ինքնավստահությամբ։ Ես գիտեմ, որ ընդունակ եմ լինել այն շատերից մեկը ով կարող է մեր երկիրը ոտքի կանգնեցնել այս ծանր արհավիրքներից հետո, որի միջով որ անցավ Հայաստանն ու հայ ժողովուրդը։
Սիրելի՛ բրյուսովականներ, այժմ ցանկանում եմ խոսքս ուղղել ձեզ։ Առանց մեկ րոպե անգամ մտածելու դիմե՛ք նմանատիպ ծրագրերի, ստացեք հնարավորություն սովորելու Եվրոպայում, ծանոթանալու նոր մշակույթների, նոր մարդկանց և նոր կրթական համակարգերի հետ։
