Այսօր մեր համալսարանում տեղի ունեցավ Գ. Ֆլոբերի և Շ. Բոդլերի 200-ամյա հոբելյանին նվիրված «Ֆրանսիական գրականության օրեր» միջոցառման բացումը:
Այս կապակցությամբ ԲՊՀ-ում հյուրընկալվել էին ՀՀ-ում Ֆրանսիայի Հանրապետության դեսպանության համագործակցության և մշակութային հարցերի խորհրդական Գիյոմ Նարժոլեն, Սորբոնի համալսարանի դասախոսներ Անդրե Գյույոն և Բերնար Ֆրանկոն, Հռոմ 3 համալսարանի դասախոս Անդրեա Սկելինոն:
Նախքան միջոցառման սկսվելը հյուրերը հանդիպեցին ԲՊՀ ռեկտոր Կ. Հարությունյանի, Համաշխարհային գրականության և մշակույթի ամբիոնի վարիչ Ն. Խաչատրյանի, ՖՀՄԱՆ կենտրոնի ղեկավար Ա. Ջանիկյանի և ԱԿՄՀ վարչության պետ Ա. Հովհաննիսյանի հետ: Ռեկտոր Կ. Հարությունյանը հյուրերին ներկայացրեց ԲՊՀ-ում ֆրանսերենի դասավանդման առանձնահատկությունները, ինչպես նաև կարևորեց ՀՀ-ում Ֆրանսիայի Հանրապետության դեսպանության և ԲՊՀ-ի միջև առկա համագործակցությունը: Երկուստեք ընդգծվեց այդ համագործակցության հնարավոր ընդլայնումը, ինչպես նաև ուսանողների շրջանում փոխայցերի կազմակերպման շարունակականությունը, և հնարավորության դեպքում՝ դրանց քանակի ավելացումը հաջորդ ուսումնական տարում:
Հաջորդիվ «Ֆրանսիական գրականության օրեր» միջոցառման բացմանը մասնակիցներին ողջունեց Համաշխարհային գրականության ամբիոնի վարիչ Ն. Խաչատրյանը և խոսքը փոխանցեց ԲՊՀ ռեկտոր Կ. Հարությունյանին:
Կ. Հարությունյան նախ ողջունեց բոլոր ներկաներին, ապա հավելեց, որ «Ֆրանսիական գրականության օրեր»-ը արդեն 7-րդ է անգամ է անցկացվում ԲՊՀ-ում: Նա նկատեց, որ մեր համալսարանում ֆրանսերենը որպես 1-ին, 2-րդ և 3-րդ օտար լեզու է դասավանդվում շուրջ 500 ուսանողի շրջանում, ովքեր ուսումնառում են այն տարբեր կրթական ծրագրերի շրջանում: Ռեկտորն ընդգծեց, որ ֆրանսերենի դասավանդման ավանդույթները մեր համալսարնում ունեն տասնամյակների պատմություն, ինչի լավագույն ապացույցը այն բազմաթիվ շրջանավարտներն են, որոնք Հանրապետությունում դարձել են ֆրանսերենի լավագույն մասնագետները:
