Սովորել մեկից ավելի լեզուներ և դա անել՝ ամենատարբեր տարիքներում. «Լեզուների Եվրոպական օր» Երևանում

Սեպտեմբերի 26-ին Երևանի Վ. Բրյուսովի անվան պետական լեզվահասարակագիտական համալսարանում (ԵՊԼՀ) տեղի ունեցավ «Լեզուների Եվրոպական օր» ամենամյա միջոցառումը:

18 տարվա ավանդույթ ունեցող միջոցառումը նպատակ ունի խրախուսել բազմալեզվությունը, որպես միջմշակութային հաղորդակցման արդյունավետ միջոց և պատանիներին ու երիտասարդներին ներկայացնել այն լեզուները, որոնց դասավանդումը լավագույն ձևով է իրականացվում շուրջ 85-ամյա պատմություն ունեցող համալսարանում:

Միջոցառման անմիջական մթնոլորտը տարիներ շարունակ իր շուրջ է համախմբում նաև մայրաքաղաքի դպրոցականներին: Համալսարանում դասավանդվող 22-լեզվով իրենց ներկայացնող տաղավարներն այսօր արևելյան և արևմտյան մշակույթներից կազմված կոլաժի էին նմանում:

Այս անգամ միմյանց հետ շփվելու հնարավորություն ունեցան Երևանի 36 ավագ դպրոցներից համալսարանում հյուրընկալվող շուրջ 600 աշակերտներ: Տաղավարներում նրանց առաջարկվում էր նաև ծանոթանալ բուհում դասավանդվող կրթական ծրագրերին:

Մասնակիցներին ողջունեց ԵՊԼՀ ռեկտոր Կարինե Հարությունյանը: Խոսելով լեզուների կարևորության մասին` նա պատանիներին և երիտասարդներին խորհուրդ տվեց հնարավորինս շատ լեզուներ ուսումնասիրել̀ այդպիսով ընդլայնելով իրենց իսկ աշխատանքային հնարավորություններն ու մասնագիտական կարողությունները:

Միջոցառմանը ներկա էր նաև Կրթության, գիտության, մշակույթի և սպորտի նախարարի տեղակալ Գրիշա Թամրազյանը, ով ողջունեց մասնակիցներին, շրջեց տաղավարներով և զրուցեց պատանիների հետ: «Լեզուների Եվրոպական օր»-ը ԵՊԼՀ-ում տարբեր երաժշտական համարներով գեղեցկացրին համալսարանի շնորհաշատ ուսանողներն ու էստոնիայից ժամանած «Ֆլորա» երգչախումբը:

Եվրախորհրդի 47 անդամ երկրների կողմից այս օրը կոչ է արվում սովորել մեկից ավելի լեզուներ և դա անել՝ ամենատարբեր տարիքներում: Սա միջոցներից մեկն է, որով Եվրախորհուրդը խրախուսում է բազմալեզվությունը Եվրոպայում`անընդհատ ընդլայնելով միջոցառման աշխարհագրությունը: