Թարգմանության և միջմշակութային հաղորդակցման ֆակուլտետի հիմնական գործունեությունն ուղղված է միջմշակութային և միջլեզվական հաղորդակցության բազմապիսի ձևերի և մասնավորապես՝ թարգմանական և հաղորդակցական հմտությունների զարգացմանը:

Մենք հավատում ենք, որ բարձրակարգ թարգմանությունները և արդյունավետ հաղորդակցումը կարող են նպաստել միջմշակութային և միջազգային փոխշփումներին, մշակութային իրազեկության մակարդակի բարձրացմանը, հանդուրժողականության և փոխադարձ հարգանքի ձևավորմանը:

Ֆակուլտետն ուսանողներին առաջարկում է մասնագիտության ժամանակակից կրթական ծրագրեր անգլերեն-հայերեն, ֆրանսերեն-հայերեն, գերմաներեն-հայերեն, իտալերեն-հայերեն, կորեերեն-հայերեն և չինարեն-հայերեն լեզվազույգերով: Ֆակուլտետում նաև իրականացվում է միջմշակութային ուսուցում՝ ուսումնասիրվող լեզուների բնախոս երկրների երկրագիտության ուսուցման հենքով:

Նպատակը: Ապահովել միջլեզվական և միջմշակութային հաղորդակցական իրազեկություն, հմտություններ, ունակություններ և կարողություններ ուսումնասիրվող լեզուների և մայրենիի հասարակական ու մշակութաբանական առանձնահատկությունների գիտակցման հենքի վրա:

Առաքելությունը: Դառնալ թարգմանական և թարգմանաբանական կրթության ազգային և տարածաշրջանային գերազանցության կենտրոն՝ թարգմանական գործունեության և թարգմանաբանական հետազոտական բոլոր ուղղություններով:

ԹՄՀ ֆակուլտետի ձեռքբերումները

• Կրթական ծրագրերը բնութագրվում են ժամանակակից կրթական մոտեցումների և լավագույն կրթական ավանդույթների գերազանց համադրմամբ։
• Առանձնանում է լեզվական և մշակութային այնպիսի գիտելիքի տրամադրմամբ, որը կարևոր է լեզուն միջլեզվական հաղորդկացության ժամանակ գործածելիս. թարգմանչի մասնագիտությունը գործնական ու պահանջարկված է ավանդաբար՝ պայմանավորած տարբեր լեզուներով խոսողների միջև հաղորդակցական կարիքներով։
• Ապահովված է միջմշակութային կրթական միջավայր. լեզվակիր դասախոսները ամեն տարի իրենց ներդրումն են ունենում կրթական գործընթացին։
• Հնարավորություն է ընձեռում լավագույն ուսանողներին սովորելու աշխարհի, մասնավորապես՝ Եվրոպայի առաջատար բուհերում: