Գոնկուրի հայաստանյան ընտրության ազգային ժյուրիի անդամները 30 էին՝ Վ․ Բրյուսովի անվան պետական համալսարանի, Երևանի պետական համալսարանի և Հայաստանում ֆրանսիական համալսարանի ֆրանսախոս ուսանողները։
2024 թ. սեպտեմբերին ԲՊՀ-ն ընտրեց ՄՀՔ և ԹՖ ֆակուլտետներից 10 ուսանող՝ Մարինա Եղոյանը, Լալա Առաքելյանը, Էլինա Գևորգյանը, Ինեսա Այվազյանը, Ջուլիա Անանյանը, Մելինե Դավթյանը, Մարիետա Մանգասարյանը, Նռանե Նահատակյանը, Անգին Առաքելյանը, Մարիամ Պետրոսյանը իրենց ֆրանսերենի դասախոս՝ Ռոմանական լեզուների ամբիոնի դոցենտ Ժակլին Մինասյանի և իրենց Ֆրանսիայի գրականության դասախոս՝ Համաշխարհային գրականության և քաղաքակրթությունների ամբիոնի դոցենտ Անի Ջանիկյանի հետ 6 ամիս շարունակ հանդիպումներ կազմակերպեցին «Գոնկուր» մրցանակի առաջին փուլը հաղթահարած ութ ֆրանսագիր հեղինակների վեպերի քննարկումների շուրջ։
Առաջին ամիսներին հանդիպումները տեղի էին ունենում ԲՊՀ Ֆրանկոֆոն հետազոտությունների միջհամալսարանական ակադեմիական նվաճումների կենտրոնում։ Փետրվարից հանդիպումները հեռավար էին, քանի որ ԲՊՀ ուսանողները մեկնել էին Ֆրանսիայի տարբեր քաղաքներ ուսումը շարունակելու նպատակով։ Հեռավորությունն անգամ խոչընդոտ չհանդիսացավ, որպեսզի խոսեն սիրո, ինքնության բացահայտման, արմատների որոնման, պատերազմների, հաղթանակների, լռության և լռությունը խզելու թեմաներից, որպեսզի վերապրեն Խադիջայի, Օբի, Միլանի, Ժակլին Արիսպի, Նաջիբի, Ալբերտ Շպեերի, Մադլենի և այլ հերոսների ճակատագրերը, քննարկեն մոդեռնիզմի, պոստմոդեռնիզմի, ենթատեքսի, էպիգրաֆի խորը հարցադրումները։ Կարծիքները կիսելուց հետո ուսանողները, ըստ նախապատվության, վերլուծականներ էին գրում իրենց նախընտրած վեպի շուրջ։
