Ս.թ. դեկտեմբերի 25-ին ԲՊՀ նիստերի փոքր դահլիճում կայացավ արդեն ավանդույթ դարձած տարեվերջյան միջոցառում՝ նվիրված Սուրբ Ծննդյան տոնին և Ամանորին: Միջոցառումը կազմակերպել էր Ֆրանսերենի և ռոմանական բանասիրության ամբիոնը՝ ի դեմս ֆրանսերենի մասնախմբի ղեկավար բ․գ․թ․, դոցենտ Ժակլին Մինասյանի։ Միջոցառումն իրենց ներկայությամբ պատվել էին ԲՊՀ ռեկտոր պարոն Դավիթ Գյուրջինյանը և պրոռեկտոր տիկին Դոնարա Ղազարյանը, որոնք ողջույնի և ամանորյա բարեմաղթանքների խոսք հղեցին բոլոր ներկաներին: Ներկա էին տարբեր ֆակուլտետների դեկաններ, պրոֆեսորադասախոսական կազմի ներկայացուցիչներ, ֆրանսախոս ուսանողներ և հյուրեր։
Ամանորյա միջոցառման լեզուն ֆրանսերենն էր։ Այն մեկնարկեց լեզվաբանության բաժնի 4-րդ կուրսի ուսանողուհիների տոնական ուրախ երգով։
Այնուհետև սկսվեց ինտելեկտուալ խաղ-մրցույթ, որը կազմակերպել էին թարգմանչական բաժնի երրորդ կուրսի ուսանողները։ Նրանք հետաքրքրաշարժ հարցեր էին պատրաստել Ֆրանսիայի խորհրդանշանների, ազգային ավանդույթների, պատմական տարբեր անցքերի, նշանավոր դեմքերի, հայտնի ճարտարապետական կոթողների մասին։ Մեկ բաժինն էլ նվիրված էր ֆրանսիացի ժամանակակից երգիչների կատարումներին։
Ավանդույթի համաձայն՝ ընտրվեց խստապահանջ ժյուրի՝ բ․գ․թ․ դոցենտ Վարդ Հարությունյանի նախագահությամբ։
