19-ամյա Մարի Դավթյանը առաջին աղջիկն էր, ով սահմանեց ցատկապարանի ռեկորդ՝ անընդմեջ ցատկելով 1ժամ 08 րոպե: Ռեկորդը գրանցվել է ՀՀ «Դյուցազնագրքում»: Մարի Դավթյանը սովորում է Վ. Բրյուսովի անվան պետական համալսարանի լրագրության 2-րդ կուրսում: Կրթությանը զուգընթաց համատեղում է արվեստը և սպորտը: Ներկայումս պարում է Ազատ Ղարիբյանի անվան «Կռունկ» պարային անսամբլում:

Սա Մարիի առաջին ռեկորդն էր, բայց ոչ վերջինը: Պատրաստվում է սահմանել համաշխարհային ռեկորդ ՝ գրանցվելով «Գինեսի» ռեկորդների գրքում:

«Պարապմունքների ժամանակ ցուցաբերել է ավելի լավ արդյունք՝ ցատկելով 2ժամ 30րոպե, իսկ 1ժամ 08 րոպեն անսպասելի արդյունք էր, քանի որ նախատեսել էինք գրանցել 2ժամ: Ռեկորդին պատրաստվել էինք շուրջ վեց ամիս: Լարվածությունը խոչընդոտեց, սակայն որպես Մարիի մարզիչ վստահ եմ, որ գրանցելու ենք մեր նախատեսած արդյունքներն իր նպատակասլացության և աշխատասիրության շնորհիվ»,- նշում է Մարիի մարզիչ Վ. Բրյուսովի անվան պետական համալսարանի դասախոս Արգիշտի Սոկրատունին: