Ս.թ. նոյեմբերի 15-17-ը Էրազմուս+ ARMDOCT /Դոկտորական կրթության բարեփոխումը Հայաստանում՝ ակադեմիական համայնքի, արդյունաբերության պահանջներին և ԵՄ փորձին համապատասխան/ ծրագրի շրջանակներում Իտալիայի Հանրապետության Տերամոյի համալսարանում կայացավ եռօրյա աշխատաժողով։ «Վ. Բրյուսովի անվան պետական համալսարան» հիմնադրամն աշխատաժողովին ներկայացրեցին Գիտության բաժնի պետ Նազելի Նավասարդյանը, Անգլերենի հաղորդակցման և թարգմանության ամբիոնի վարիչ Գայանե Հովհաննիսյանը, Լեզվաբանության և հաղորդակցման տեսության ամբիոնի վարիչ Լիլիթ Բադալյանը և Գիտական քարտուղար Հասմիկ Փիլավջյանը։
Աշխատաժողովը նպատակաուղղված էր դոկտորական կրթության կազմակերպման եվրոպական, մասնավորապես՝ իտալական փորձի և զարգացման միտումների ուսումնասիրմանը, ինչպես նաև ՀՀ բուհերում և գիտահետազոտական կազմակերպություններում դոկտորական դպրոցների ստեղծման հնարավորությունների ու առկա մարտահրավերների շրջանակին, այդ թվում՝ ինստիտուցիոնալ մակարդակում երրորդ աստիճանի կրթության բարոփոխման առանձնահատկություններին և դրա լավարկման մեխանիզմներին:
