Գերմանիայի Դաշնային Հանրապետության տնտեսական համագործակցության և զարգացման նախարարության պատվիրակմամբ՝ Գերմանական միջազգային համագործակցություն ընկերությունը (ԳՄՀԸ) 2017-2020 թթ.-ին իրականացնում է «Մասնավոր հատվածի զարգացում և մասնագիտական կրթություն և ուսուցում Հարավային Կովկասում» (ՄՀԶ ՄԿՈՒ) ծրագիրը, որի նպատակներից մեկն է խթանել մասնագիտական որակավորման առաջխաղացումը և ՄԿՈՒ համակարգում դուալ ձևաչափի փորձարկումը ընտրված արժեշղթաներում՝ համագործակցելով պետական և մասնավոր հատվածների հետ: Տնտեսական զարգացման հիմնական նախապայմաններից է որակյալ և հմուտ աշխատուժի առկայությունը: Ծրագիրն ուղղված է մասնագիտական կրթության և ուսուցման առաջարկների մշակմանն ու արդիականացմանը, մասնավոր հատվածի և կրթական հաստատությունների միջև համագործակցության ամրապնդմանը:

2016թ-ից սկսած ՄՀԶ ՄԿՈՒ ԳՄՀԸ ծրագրի փորձագետները Վ. Բրյուսովի անվան պետական լեզվահասարակագիտական համալսարանի պրոֆեսորադասախոսական կազմի հետ համատեղ մշակում են «Մասնագիտական մանկավարժություն» մագիստրոսական ծրագիրը ՄԿՈՒ դասավանդողների համար: Ծրագրի շահառուներին թիրախավորելու նպատակով աշխատանքների ընթացքում կազմակերպվել են ՄԿՈՒ դասանդողների կարիքների գնահատում, վերապատրաստումներ, աշխատաժողովներ: Հարցմանը մասնակցել են 12 ՄԿՈՒ հաստատություններ, որտեղ ներկայումս փորձարկվում է դուալ ուսուցումը: