“HUMAN ART POETRY DIALOGUE” նախագծի ցուցահանդես և գրքի շնորհանդես

Ս.թ. հոկտեմբերի 25-ին Երևանի Վ. Բրյուսովի անվան պետական լեզվահասարակագիտական համալսարանի ավստրիական գրադարանին հարակից սրահում կայացավ “HUMAN ART POETRY DIALOGUE” նախագծի ցուցահանդես և գրքի շնորհանդես: Ցուցադրության ժամանակ ներկայացվեց գերմանացի նկարիչ, ճարտարապետ Օտտո ֆոն Քոցեբուի 17 ջրաներկերը և հայ նկարիչ, քանդակագործ Ցոլակ Սիմոնյանի աշխատանքները, ով, ոգեշնչվելով Օտտո ֆոն Քոցեբուի նկարներով, իր պատկերացումներն արտահայտել է չափածոյով: Միջոցառման մասնակիցներին ողջունեց ԵՊԼՀ ռեկտոր տիկին Կարինե Հարությունյանը՝ շեշտելով. «Համալսարանը, լինելով տարբեր լեզուների և մշակույթների կրողը ու ուսուցանողը, միշտ մեծ տեղ է տվել ուսանողների նաև գեղագիտական զարգացմանը, և այս միջոցառումը դրա վառ օրինակն է։ Մի միջոցառում, որը ևս մեկ անգամ ապացուցում է, որ արվեստը չի ճանաչում ազգություն և սահմաններ, այլ ընդհակառակը միավորում է հայ և գերմանացի երկու արվեստագետներին, որոնք իրենց ստեղծագործություններով կարծես երկխոսության մեջ են մտել` ներդաշնակ դարձնելով նկարչությունը ու պոեզիան»:

Միջոցառմանը ներկա էին և ողջույնի խոսքով հանդես եկան նաև ՀՀ-ում Գերմանիայի Դաշնային Հանրապետության Արտակարգ և լիազոր դեսպան Ն.Գ. պարոն Միխայել Յոհաննես Բանցհաֆը, Երևանում «Գյոթե կենտրոնի» ղեկավար, մշակույթի փորձագետ Նաթիա Միքելաձե-Բախսոլիանին, “HUMAN ART POETRY DIALOGUE” նախագծի ղեկավար Տաթև Մնացականյանը, Նկարիչ, քանդակագործ պարոն Ցոլակ Սիմոնյանը:

ԵՊԼՀ գերմանախոս ուսանողները նաև ներկայացրեցին Ցոլակ Սիմոնյանի բանաստեղծություններց և հանդես եկան երաժշտական համարներով:

Արվեստի և պոեզիայի սիրահարների համար ցուցադրությունը բաց կլինի մինչև 2019թ. նոյեմբերի 25-ը:

“HUMAN ART POETRY DIALOGUE” նախագծի ցուցահանդես և գրքի շնորհանդես