ԲՊՀ-ի Ֆիզիկական կուլտուրայի և քաղաքացիական պաշտպանության ամբիոնը հիմնադրվել է 1949 թ-ին: Ըստ արխիվային փաստաթղթերի ունեցել է 4 դասախոս: Ամբիոնի առաջին վարիչը եղել է Մարգարիտա Գուտովան (Բաքվի ֆիզիկական կուլտուրայի ինստիտուտի շրջանավարտ):

Ավելի քան 70 տարիների գործունեության ընթացքում ամբիոնն ունեցել է զարգացում թե՛ կադրային քաղաքականության առումով, և թե՛ տարվող գործունեության ծավալներով:

Տարբեր ժամանակահատվածներում ամբիոնում աշխատել են լաբորանտներ, դասախոսներ, ավագ դասախոսներ, դոցենտներ, պրոֆեսորներ, գիտության թեկնածուներ, ովքեր իրականացրել են ուսումնական, գիտական, կրթական, մարզական և կազմակերպչական գործունեություն՝ նպաստելով ապագա տարբեր մասնագետների առողջ և անվտանգ կենսագործունեությանն ու ստեղծագործական երկարակեցությանը:

Ֆիզիկական կուլտուրայի և քաղաքացիական պաշտպանության ամբիոնի հիմնական նպատակն է համալսարանի բոլոր մասնագիտացումների ուսանողներին հաղորդակից դարձնել առողջ ապրելակերպի, ինքնուրույն ֆիզիկական վարժություններով մարզումների, քաղաքացիական պաշտպանության և արտակարգ իրավիճակների հիմունքներին, նպաստել նրանց մարզական կողմնորոշմանը, ինչպես նաև պատրաստել նրանց դիմակայելու տարատեսակ բնածին և տեխնածին աղետներին:

Ֆիզիկական կուլտուրայի և քաղաքացիական պաշտպանության ամբիոնը բարձր արդյունքներ է արձանագրել նաև ուսանողական սպորտի բնագավառում՝ ԲՊՀ հավաքական թիմերը տարբեր ժամանակահատվածներում դարձել են հանրապետական ուսանողական առաջնությունների հաղթող և մրցանակակիր մի շարք մարզաձևերից:

Ներկայումս ամբիոնն իրականացնում է ուսումնադաստիարակչական և գիտամեթոդական գործունեություն «Ֆիզիկական կուլտուրա», «Քաղաքացիական պաշտպանության և արտակարգ իրավիճակների հիմնահարցեր» դասընթացների շրջանակներում: Ամբիոնում գործում է նաև վոլեյբոլի մարզական կատարելագործման խմբակ: Բացի այդ, բժշկական խմբերի ուսանողներն ընդգրկվում են «Հատուկ ֆիզիկական կուլտուրայի» խմբում:

Ամբիոնն իրականացնում է նաև համատեղ գիտահետազոտական աշխատանքներ արտերկրի բուհերի համապատասխան ոլորտների մասնագետների հետ, նրանց հետ համատեղ կազմակերպվում են թեմատիկ գիտական կոնֆերանսներ: Ֆիզիկական կուլտուրայի, սպորտի, քաղաքացիական պաշտպանության և արտակարգ իրավիճակների ոլորտների արտասահմանյան մասնագետները ներգրավվում են հեռավար տեսակոնֆերանսներում:

Ներկայումս ամբիոնը բաղկացած է 7 բարձրակարգ մասնագետներից՝  3 դասախոս, 2 ավագ դասախոս, 1 դոցենտ և 1 մանկավարժական գիտությունների թեկնածու, դոցենտ: Ֆիզիկական կուլտուրայի և քաղաքացիական պաշտպանության ամբիոնի վարիչն է մ.գ.թ., դոցենտ Էռնեստ Յուրիի Ավանեսովը:

Ներամբիոնային գիտական թեման է. «Սովորողների շարժողական ընդունակությունների կատարելագործման ուղիները ֆիզիկական դաստիարակության, սպորտային գործունեության և արտակարգ իրավիճակների պայմաններում»: